اور میں نے پوچھ ہی لیا کہ تم لوگ روزہ رکھتے ہو تو اس نے غصیلی آنکھوں سے رعب دار آواز میں کہا کہ کیا ہم مسلمان نہیں ہیں؟

رمضان المبارک کی آمد آمد ہے‘ وقت اڑھائی بجے ہیں میں کچھ رمضان المبارک اور کچھ نیند کی غنودگی لیے اپنی سوچوں میں گم تھا کہ ناگہا دکان کے باہر شور شرابہ شروع ہوگیا کچھ لڑکے اور ایک لڑکی کی آواز آرہی تھی۔ میں نے گھبرا کر دروازہ کھول دیا۔ ہاں وہ لڑکی جو کہ خانہ بدوش تھی کچھ لڑکے اسے تنگ کررہے تھے‘ مجھے دیکھتے ہی وہ لڑکے بھاگ گئے‘ اس کا دوپٹہ اٹھا کر اس بھولی بھالی لڑکی کے سر پر رکھا اس وقت اس کی مشکور آنکھوں سے ایک عجیب سی چیز میرے حصے میں آرہی تھی۔ مجھے بڑی اندرونی خوشی محسوس ہورہی تھی‘ میں نے اسے مخاطب کرتے ہوئے کہا کہ بیٹھ جاؤ اور پانی پی لو۔ وہ روزانہ جب اس طرف اس کا آنا ہوتا تو ضرور بضرور حاضری لگا کر جاتی تھی۔ پانی پینا تو اس کا معمول ہوچکا تھا۔ سخت گرمی اور دوپہر کے وقت پانی پلانا بڑا خوشی کا مظہر ہوتا ہے۔ اسی طرح وقت گزرتا رہا اور پھر ایک دن جبکہ رمضان المبارک کا پہلا یا دوسرا دن تھا اور کچھ کمزوری محسوس ہورہی تھی مگر وہ ویسے ہی چاق و چوبند تھی اس کی کسی حرکت سے محسوس نہیں ہورہا تھا کہ آج اس کا روزہ ہے۔ میں نے پوچھ ہی لیا کہ تم لوگ روزہ نہیں رکھتے ہو تو اس نے غصیلی آنکھوں سے رعب دار آواز میں کہا کہ کیا ہم مسلمان نہیں ہیں؟ اس خاتون کے اس جواب سے میں خاموش ہوگیا۔ اس نے کہنا شروع کیا کہ جب میں افطار سے پہلے اپنے ڈیرے پر واپس جاتی ہوں تو حسب معمول سحرو افطار کا تمام سامان لیکر جانا پڑتا ہے۔ یہ سن کر مجھے تو اپنے مسلمان ہونے پر شک ہونے لگا۔ آہ! سحری و افطاری میں ہماری نہ ختم ہونے والی خواہشیں ہمیں پریشان کیے رکھتی ہیں لیکن اے! معصوم بھولی بھالی لڑکی یہ تم نے کیا کہہ دیا ہم تو ہر شے پر لڑتے جھگڑتے رہتے ہیںیہ پراٹھا ٹھنڈا ہوگیا ہے دوسرا بنادو‘ یہ دہی بالائی اور اسی طرح کے دوسرے لوازمات جسے ہم کچھ بھی نہیں سمجھتے اپنی کمزوریوں سے خراب کرنے میں آگے آگے رہتے ہیں‘کیا کبھی آپ نے ایسے سفید پوشوں سے پوچھا ہے کہ ان کی کیا کیا خواہشیں ہیں۔